Проблемот со пристапот на лицата со посебни потреби во јавните установи во општината, како и слободното движење во градот треба да се решат со Локалниот акционен план за унапредување на положбата на лицата со попреченост, што наскоро треба да го донесе општината Охрид. Денеска беше презентиран Предлог локалниот акционен план кој е резултат на 6-месечната активност на работната група составена од претставници на Општината, организациите на лица со попреченост и јавни институции од областа на социјалната заштита, здравството, образованието и вработувањето, која интензивно работеше во утврдувањето на приоритетите и потребите на лицата со попреченост во општина Охрид.
– Се работеше на идентификување на приoритетите и проблемите со кои лицата со попречениост се среќаваат во секојдневниeто и како тие преку конкретни акции да се надминат. Во одредени области локалната самоуправа може да ги реализира тие приоритети без средства или со минимални средства, бидејќи целта е да направиме реална листа на проблеми и активности кои што може да се спроведат, а не да правиме список на желби, истакна Владо Крстовски од Републичкиот центар за поддршка на лица со интелектуална попреченост.
По јавната дебата на која покрај претставниците на организаторите, работната група и заинтересирани грагани и асоцијации, учествуваа и претседателот на Советот, координатори на советнички групи и советници, Локалниот акционен план за унапредување на положбата на лицата со попреченост ќе биде надополнет и финализиран, по што ќе следи негово усвојување во Советот на општината.
