Како што објаснуваат од локалната самоуправа, за проектот изработен согласно највисоките светски стандарди, одобрени се над 20 милиони денари средства со кои ќе се проширува и обновува патот од селото Лескоец до Скребатно, во должина од 9 километри.Изведувач на градежните работи е струшката фирма „Илинден“.
– Освен да се обнови овој патен правец, целта беше и да се прошири со оглед на големиот број гости и верници кои го посетуваат излетничкото место во Скребатно и црквата „Света Богородица“, особено во летниот период за празникот Голема Богородица, вели Емин Селман од Фондот за патишта и комунален развој.
Градежните работи на патот до Скребатно се очекува да бидат завршени до почетокот на летната сезона.
Селман потенцира дека ова е трет одобрен проект изработен од локалната самоуправа за санација и реконструкција на патишта во охридско. Претходно со срества од Светската банка веќе се обновени патиштата кои водат до Велгошти и Орман, а се очекува до крајот на годината да бидат одобрени и проектите наменети за реконструкција на патиштата до Велестово, Елшани и Завој.