„Климент и Наум наша духовна светлина“ ќе биде  насловот на големата изложбата која што ќе се одржи во декември, во Скопје, по повод 1100 годишнината од  смртта на Св. Наум Охридски. Како дел од подготовките за оваа изложба, вчера во Отвореното графичко студио во Скопје , се одржа отворена средба со ликовните автори кои што ќе учествуваат на изложбата.


Уметничките дела кои што ќе се изложат, треба да бидат инспирирани од животот и делата  на Св. Климент и Св. Наум.  Најавената репрезентативна ликовна изложба ќе биде проследена со пригоден каталог со репродукции на делата, со воведен текст на македонски, италијански и руски јазик, а во него ќе бидат поместени фрагменти од Свети Климентовите „Пофални слова“ и најубавите песни од современите македонски поети, посветени на Климент и Наум.

Асоцијацијата за култура по презентацијата во Скопје планира да конкурира за обезбедување на финансиски средства за изложбата во 2011 година, да биде претставена и во Рим, на традиционалните Денови на „Св. Кирил и Методиј“.

Во овој значаен проект за одбележувањето на јубилејот значаен за севкупниот словенски свет, учествуваат уметниците: Васко Ташковски, Глигор Чемерски, Благоја Дрнков, Симон Шемов, Павле Кузмановски, Петар Попчев, Благој Чушков, Стефан Хаџиниколов, Доне Милјановски, Ставре Димитров – Стадим, Илија Спасовски – Чендо, Слободан Живковски , Ангеле Нацевски и други.

OhridNews