Претставници на Универзитетот “Св. Климент Охридски“ од Битола , во чии рамки работи Факултетот за туризам и угостителство од Охрид, беа во официјална посета на Универзитетот “ Намик Кемал“ од Текирдаг и учествуваа на научната конференција посветена на стогодишнината од Балканските војни.
Посетата беше искористена за презентација на Охрид, неговото културно- историско наследство и природните убавини. Се водеа и разговори за соработката меѓу двата универзитети, размена на професори и студенти.
Делегацијата на општина Охрид во која беа претседателот на советот на општина Охрид Душко Јаковчески, членот на советот Кујтим Усеини и претставникот на ТЛЕР Илкер Мустафа, оствари средби со градоначалниците од Текирдаг Јеничифлик, Барбарос, Кумбаг, Мармара Ереглиси и Општината Бајрампаша. Беше разговарно за унапредување на досегашната соработка и во име на градоначалникот Александар Петрески им беше упатена покана да го посетат Охрид.
Во рамките на посетата во Стопанската комора во Текирдаг, охридската делегација се сретна и со претставници на бизнис секторот. При тоа, турските бизнисмени беа запознаени со потенцијалните можности за инвестирање во Охрид.