Во завршна фаза на изработка е вториот ЛЕАП(Локален еколошки акционен план) на Општина Охрид.Обврската за донесување на ЛЕАП произлегува од Законот за животна средина,а во согласност со Националниот еколошки акционен план и методологијата пропишана од страна на Министерството за животна средина и просторно планирање за донесување на локални еколошки акциони планови. ЛЕАП документот општината го донесува врз основа на оцената на своите специфични состојби и потреби, и тој има важност за период од шест години. Првиот ЛЕАП на Општина Охрид беше донесен во 2002 година.
Изготвена е нацрт верзија на вториот ЛЕАП која беше доставена на разгледување до седумте работни групи составени од стручни лица од различни области. Деновиве беа одржани состаноци на претставници на општината, изработувачот на ЛЕАП-от и членовите на работните групи. Притоа беше разгледан подготвениот материјал и беа прифатени мислењата и забелешките на членовите на работните групи, што ќе придонесе за добивање на поквалитетен и посеопфатен документ кој реално ќе ги отсликува состојбите и можностите на Општината,информираат од локалната самоуправа.
Нацрт верзијата на документот ќе биде достапна за пошироката јавност, а ќе биде организирана и јавна расправа, пред документот да биде донесен од страна на Советот на Општина Охрид.
OhridNews
