Полициските служби на СВР Охрид ги спроведуваат сите потребни оперативни мерки за потрага по 14-годишното девојче од селото Лешани, кое се води како исчезнато повеќе од три недели. За таа цел во реонот на Општина Дебрца пред шест дена беше спроведена голема акција за потрага, во која беа вклучени полициски службеници од Охрид, Струга и Кичево, како и роднини на исчезнатото девојче и дел од месното население на општината.
Ваква акција СВР Охрид реализираше и неодамна во атарот на селата Песочан и Црвена Вода, а на барање на Охридската полиција Министерството за внатрешни работи распиша и меѓународна потерница по исчезнатото девојче.
Ова е втор пат девојчето да го напушти својот дом. Претходно тоа беше пријавено за исчезнато на почетокот на ноември годинава. Тогаш беше пронајдено во Скопје и со придружба на еден родител беше вратено дома.
OhridNews
