Се одбројуваат деновите до почетокот на Вевчанскиот карневал, посветен на Свети Василиј Велики- заштитникот на вевчанските василичари со кој воедно се слави доаѓањето на Новата година според стариот календар. Карневалот кој од година во година привлекува се поголем интерес кај гостите од земјава и странство, неофицијално ќе започне на 12 јануари попладнето со изложба на фотографии од Атанас Ќушкоски на тема женски маски, а ќе продолжи вечерта со голем рок хепенинг на кој меѓудругите ќе настапат Ареа, Црвена јабука и Скандал состав.
Главниот карневалски ден е 13 јануари со традиционалното дефиле на маски, со пречек на Старата нова година на отворено на плоштадот во Вевчани со концерт на естрадни уметници од земјава и соседството.
Манифестацијата завршува на 14 јануари со традиционалното Вевчанско василичарско оро и ритуалното палење на маските.
Како што истакнуваат од организациониот одбор на карневалот, специфичност на карневалот е што никогаш однапред не се знаат кои маски ќе можат да се видат , но секако не изостануваат традиционалните маски – зет, невеста и Глупавиот Август.
Во 1993 година Вевчанскиот карневал, односно Вевчани е член на ФЕЦЦ – Асоцијација на светските карневалски градови под уставното име на Република Македонија.
OhridNews
