Фудбалерот со најмногу настапи во македонскиот дрес, Гоце Седлоски се повлече од тренерската позиција во Вардар поднесувајќи оставка до Упрвата на клубот.
Оставката, најблаго речено е неочекувана поради резултатите кои „црвено црните“ ги имаа ова лето во европските мечеви и два дена пред дуелот со Фенербахче во Скопје во рамките од баражот за пласман во Лигата на Европа.
– Јас, Гоце Седлоски денес донесов одлука да си поднесам оставка од местото шеф на стручен штаб на ФК Вардар, за доброто на сите во клубот. Ова размислував да го направам уште после вториот натпревар со ФК Копенхаген кој што го загубивме. Сепак, успеав да соберам сили и да го започнам македонското првенство. После загубениот натпревар со Шкендија, овие два дена размислував добро и денеска ја донесов оваа одлука. Тие два порази ме погодија многу бидејќи јас како човек не сум навикнат да губам, но и фудбалскиот клуб Вардар не е навикнат на порази.
Горд сум на постигнатото. Успеавме да освоиме две титули во две години, а горд сум и на победата над Малме и пласманот во третото квалификациско коло од Лигата на шампионите, како и домашната победа со Копенхаген.
Сакам да се заблагодарам на играчите, управата и до сопственикот г-нот Сергеј Самсоненко од кој имав несебична поддршка во целиот период. Благодарност и до сите вработени во Фудбалскиот клуб Вардар. Жалам, дојде време да се разделиме. На фудбалскиот клуб Вардар му посакувам успех на европска сцена во плеј-офот од Лигата на Европа против Фенербахче, како и во домашното првенство и Купот на Македонија“. – стои во соопштението од Гоце Седлоски.
„Црвено црните“ ќе мораат експресно да реагираат и да постават тренер кој ќе ги води на дуелот со Фенербахче. Натпреварот се игра на „Телеком“ арената во четврток.
OhridNews
