Соодветен третман на отпадните води ќе треба да изврши ресторанот на островото. Санитарните јазли од овој објект се поврзани на путекс – машина за пречистување на отпадните води која е поставена во 2004 година со дозвола на Министерството за животна средина. Врз неа бил извршен ремонт, но инспекторатот бара таа да функционира беспрекорно.
– Извршените хемиски и микробиолошки анализи на водите од изворите во Св. Наум покажаа присуство на одредена количина бактерии, кои не би смеело да ги има во подрачје кое е заштитено од УНЕСКО. Таа состојба не е толку алармантна доколку станува збор за сливови кои што се во други делови на Охридското Езеро, меѓутоа за изворите на Св. Наум не смее да се дозволи ни таа количина. Од таа причина ги задолживме одговорните како инспекторат да извршат комплетен ремонт на путексот, односно да го доведат во состојба во која што ќе ги пречистува водите комплетно, да не ни се случи повторно да се најдат такви бактерии во водата затоа што тоа може да придонесе за пореметување на флората и фауната во самото извориште, ни изјави Лилјана Спиркоска – овластен инспектор за животна средина при општинс Охрид.
Обврска соодветно да ги третира отпадните води презеде и хотелот „Маркони“, вели раководителот на општинскиот инспекторат Танас Танасоски.
– Договорено е во рок од 30 дена х. „Маркони“ да поднесе комплетна техничка документација до Секторот за урбанизам и заштита на животната средина, а до месец мај 2010 да се изгради нова пречистителна станица. Сето тоа ќе биде потврдено и со решение, а доколку до мај не биде изградена пречистителната станица ќе бидат преземени други мерки, рече Танасоски.
Иницијативата на општинскиот инспекторат уследи откако ова лето во Св. Наум беа регистрирани повеќе случаи на труење со загадена вода во која беа пронајдени колиформни бактерии од типот на ешерихија коли. Со цел да не се повтори ваквата ситуација инспекторат ги задолжи угостителските објекти во Св. Наум соодветно да го решат проблемот со отпадните води.
