Високи казни за загадувачите, но и за институциите што не постапуваат, се најчестиот одговор на читателите на OhridNews во анкетата на порталот на тема „Што треба да се направи да се спречи загадувањето на животната средина?“.
Во анкетата учествувале 1.012 читатели, а убедливо најголема поддршка добила опцијата „Високи казни за загадувачите, но и за надлежните за непостапување“, за која гласале 581 читател или 57 проценти од учесниците.
На второ место е одговорот „Функционални институции“, кој добил 190 гласа (19 проценти), што укажува дека значителен дел од граѓаните сметаат дека клучот за решавање на еколошките проблеми е доследната примена на законите и ефикасното функционирање на институциите.
Според 140 испитаници (14 проценти), екологијата треба да добие многу повисоко место во општеството и образовниот систем, додека 101 читател (10 проценти) смета дека системот „Сејф сити“ треба да се користи и за откривање и санкционирање на еколошки прекршоци.
Резултатите од анкетата покажуваат дека најголемиот дел од учесниците очекуваат поодлучна примена на законите и поголема одговорност од институциите во справувањето со загадувањето, кое останува едно од најзначајните прашања за граѓаните.
Напомена: Анкетата е од информативен карактер и ги одразува ставовите на читателите кои доброволно учествувале во гласањето на порталот OhridNews.
OhridNews
Следна анкета:„Дали како општество поседуваме институционален капацитет, политичка волја и граѓанска свест за да го спасиме Охрид од губење на статусот во УНЕСКО?“
