Роднините со неверување ја примија веста за тешката сообраќајна несреќа, што вчера се случи во Грција, во која животот го загубија четворица членови на семејството Шемо од Струга.
Ги затекнавме пред домот на загинатите во центарот на градот, скршени од болка. Ни кажаа дека загинатите биле добри и чесни луѓе. За време на кобното патување постојано биле во контакт со роднините, а последен пат се слушнале со нив час и половина пред тешката сообраќајна несреќа во која загинаа мајка, син, ќерка и малолетно внуче, а уште пет лица беа повредени.
-Се враќаа од свадба во Турција, каде заминаа пред три дена. На влез во Грција се случи голема несреќа, но не знаеме што ја предизвикало, изјави Зекир Јусуф – роднина на загинатите.
Веднаш по несреќата дел од роднините заминале во Кавала Грција, каде се хоспитализирани преживеаните. Таму од вчера е и претставник на Македонскиот козулат. Оттаму информираат дека се преземаат сите потребни активности за помош на повредените и пренесување на телата на загинатите во Македонија. Според процедурата врз починатите треба да се изврши обдукција, што малку ја компликува ситуацијата бидејќи се работи за муслимански верници, па се чека согласност од роднините за овој дел од протоколот и начинот на транспорт во Струга. Исто така бил ангажиран и адвокат за возачот на комбето, кој треба да даде изјава пред грчките истражни органи, која треба да ги расветли причините за големата трагедија.
Семејството Шемо е меѓу најугледните во Струга. Сограѓаните велат дека се големи еснафи и успешни деловни луѓе. Нивните дуќани во центарот на градот денеска не работеа. Струшката јавност е потресена од големата трагедија, кометирајќи дека ова лето во градот на Дрим, како никогаш порано, се случиле голем број немили настани.
OhridNews
