Шпанија е новиот светски првак

Натпреварот во најголем дел мина во тактичко надмудрување на двајцата селектори. Холандија одигра мошне зрело во првиот дел кога не им оставаше простор на шпанските креативци да дојдат до израз. Со доста остра, на моменти груба игра беа запирани играчите за врска по што Хауард Веб мораше со серија жолти картони да ја смирува тензијата.

Откако почна да паѓа концентрацијата и да се прават повеќе грешки, првата и најзрелата прилика на мечот ја имаше напаѓачот на Холандија, Арјен Робен кој изби “очи в очи“ со Касиљас но не успеа да го совлада капитенот.

Комбинаториката на шпанците се разгоруваше, а најдобриот стрелец во тимот Виља не ја казни грешката на потесната одбрана на “лалињата“. Започнаа да менуваат селекторите, а подолгата клупа и поголемиот избор на Дел Боске и отвори повеќе простор на “фуријата“.

Но дефанзивно ориентираните холанѓани повторно ја имаа шансата на мечот кога по втор пат на натпреварот Робен преку контранапад изби сам пред Касиљас, но и овој пат не ја погоди целта. На спротивната страна таква прилика имаше Фабрегас, потоа и Иниеста но мрежите се уште мируваа.

По 90 минути без гол, актуелните европски прваци притснаа во продолжението. На стартот на второто  продолжение, Дел Боске го повлече последниот потег кога во игра го уфрли, златното момче од Виена, Фернандо Торес.

Дополнителни проблеми за одбраната на Ван Мервијк беше и исклучувањето на Хејтинга поради два жолти картони. По неговото исклучување се играше на половината на Холандија, а стрпливата игра на маестралниот среден ред на “фуријата“ во 116 минута и створи златна прилика. Фабрегас го проигрува Иниеста, кој не промашува, ја тресе мрежата на лалиња и светот се обојува во црвено.

На европската, Шпанија ја придодаде и светската круна