Шумите и зелениот појас на охридското крајбрежје не треба да се експлоатираат, туку соодветно да се заштитат, сметаат граѓаните. На ова укажуваат и резултатите од анкетата што за свои потреби ја спроведе OhridNews изминатите две седмици. Големо мнозинство или 70 отсто од читателите вклучени во анкетата сметаат дека шумите и зелениот појас на охридското крајбрежје треба да се заштити, 22 отсто се на мислење дека тие треба да се стават во функција на одржлив развој, а 8 проценти сметаат дека тие треба да се експлоатираат.
Експертите укажуваат дека е неопходно да се сочуваат шумските зелени површини за да има и поголем прилив на вода во Охридското Езеро, посочувајќи го влијанието кое тие го имаат на подземните води. Со тоа, според нив, ќе се придонесе кон поголемо мешање и промена на водата, која ќе биде еколошки почиста, со што ќе се подобрат условите за развој на флората и фауната. Експертите нагласуваат дека природната и здрава шумска почва има значително повеќе воздушни пори кои се наоѓаат во поголеми длабочини во самата почва, каде се формираат долги канали во кои се собира вода која понатаму истекува во подземните патишта и се влева во Охридското Езеро. Колку почвата во својот шумски појас е поровита може да прими и акумулира поголема количина вода, а притоа нејзиното истекување е побавно, односно трае подолг период од годината и истата еколошки е најчиста, посочуваат експертите.
OhridNews
