Познатиот македонски пијанист, Симон Трпчески, ќе ја има честа да го отвори годинешното, јубилејно издание на фестивалот Охридско лето. Како што OhridNews неофицијално дознава, организаторите на фестивалот одлучиле 50- то издание да го отвори македонски изведувач. Во тек се преговори за тоа кој ќе го придружува Трпчески, дали тоа ќе биде Кралската филхармонија од Лондон или пак од Русија. На крај од овој месец се очекува да биде комплетирана годинешната програма на фестивалот по што и официјално ќе и биде презентирана на јавноста.


според најавите Симон Трпчески ќе го отвара Охридско лето

Од Дирекцијата на фестивалот велат дека не можат да ја потврдат информацијата на OhridNews, но не ја демантираат.

–Се ќе биде дефинирано на седницата на Управниот одбор во Скопје деновиве, велат од фестивалската управа.

Подготовките за јубилејното издание на Охридско лето се во полн ек. Покрај еминентни музички и театарски имиња, во Охрид се очекува да допатуваат и првите луѓе на Европската асоцијација на фестивали, како и претставници на познати европски фестивали. По повод 50-годишнината од постоењето на Охридско лето ќе биде отпечатена поштенска марка, а предвидени се и голем број пропратни манифестации.

Т.К./Г.М.