Алгоритмите сè повеќе влијаат врз тоа кои вести стигнуваат до публиката, политичарите можат да ѝ се обратат директно, а вештачката интелигенција отвора нови прашања за автентичноста на содржините. Во таква средина, претседателката Гордана Сиљановска-Давкова на медиумскиот форум во Скопје го постави прашањето од кое зависи довербата во новинарството: како до јавноста да стигнат проверени информации кога притисокот да се објави прв е сè поголем?

Брзината можеби е технолошка предност, но точноста останува професионална обврска, рече Сиљановска-Давкова во воведното обраќање на 20. Форум на медиумите од Југоисточна Европа (SEEMF).

Таа предупреди дека полесниот пристап до информации сам по себе не ја зголемува довербата во нив. Кратките видеа и сликите, посочи, сè почесто го потиснуваат објаснувањето на настаните, додека употребата на вештачка интелигенција отвора прашања за тоа кој ја создал содржината и колку таа е веродостојна.

Кој ги поставува прашањата кога власта се обраќа директно?

Претседателката се осврна и на односот меѓу власта и медиумите. Покрај обидите за директна контрола и притисок, таа го посочи и сè почестото заобиколување на новинарите преку директни обраќања до јавноста. Според неа, независноста на редакциите е услов новинарите да можат да ги испитуваат одлуките на власта и да откриваат злоупотреби.

Негова должност е критички да ја испитува секоја форма на моќ, вклучително и сопственото влијание, рече таа за улогата на новинарството.

Одговорноста на медиумите, додаде, се гледа и во секојдневните уреднички одлуки: кој добива збор, кој настан станува главна вест и кои теми остануваат на маргините. Со тие избори редакциите влијаат врз прашањата за кои се води јавна дебата.

Медиумската слобода зависи и од условите за работа

Сиљановска-Давкова зборуваше и за заканите, несигурните работни услови и психолошкиот товар на новинарите кои известуваат од несреќи, пожари и вооружени конфликти.

Слободата на медиумите подразбира и безбедност, достоинство, професионална автономија и економска независност за новинарите, нагласи претседателката.

Без пристап до проверени информации, порача таа, на граѓаните им е потешко да ги разграничат фактите од пропагандата и да изградат сопствен став. Токму можноста да донесуваат информирани одлуки, според Сиљановска-Давкова, му дава суштина на нивното учество во демократијата.

OhridNews