Викендов во Белград (Србија) се одржа Европска Атлетска Конвенција на која беа организирани неколку настани, како Вонреден Конгрес на ЕАА, Конгрес на Асоцијацијата на Балканските атлетски федерации, Календарска конференција, прогласување на најдобрите и најперспективните атлетичари во Европа, и неколку форуми и работилници.
На овој настан Атлетската федерација на Македонија ја представуваа Дејан Ангеловски стручен секретар во АФМ и Иван Цветкоски член на ИО на АФМ.
На Конвенцијата беа остварени голем број на контакти со повеќе претседатели и генералните секретари на повеќе Балкански и Европски федерации, меѓу кои и со ПотПретседателот на ИААФ, Сергеј Бубка, Претседателот на ЕАА, Хансјорг Вирц, и ПотПретседателот на ЕАА, Свен Арне, кој најави дека ќе ја посети АФМ од 21 до 22 март следната година.
На конгресот на Асоцијацијата на Балканските атлетски федерации по предлог на АФМ за нов претседател со двегодишен мандат беше избран Претседателот на Бугарската федерација, Добромир Карамаринов.
АФМ по подолго време ќе биде организатор на Балканско првенство, конкретно АФМ ќе го организира Балканското првенство во маратон кое ќе се одржи во склоп на Скопскиот Маратон на 8 мај 2011 година.
OhridNews
