Поради директна или индиректна инволвираност во активностите поврзани со акцијата „Детонатор“, суспендирани се 24 вработени во Управата за јавни приходи, информираше министерот за финансии Зоран Ставрески на заедничка прес конференција со директорот на УЈП Горан Трајковски, што вчера се одржа во Скопје.
Промените го зафатија и даночното одделение во Охрид, каде е сменет координаторот. Смени на оваа позиција има и во даночните одделенија во Прилеп, Куманово и Кичево, како и во даночните шалтери во Крива Паланка, Делчево, Берово, Виница и Демир Хисар и 12 контролори во инспекција во Штип, Битола и Тетово. Исто така суспендирани се и тројца управници на регионалните дирекции на УЈП во Штип, Битола и Тетово.
Министерот Ставрески истакна дека со кадровските промени УЈП покажала дека неселективно се бори против сите прекршители на законот.
