Што е сексуална злоупотреба( педофилија), кое лице се нарекува педофил, кој може да стане жртва и како таа да се препознае- се дел од темите на кои се разговараше на денес одржаната работилница во просториите на општинскиот Црвен крст, на која беше потенцирано големото значење на едукацијата и стекнувањето знаење во превентивното дејствување за спречувањето на појавата на сексуалната злоупотреба  на децата.

– Ова е тема за која треба што почесто да се говори , бидејќи станува збор за појава која се провлекувала во минатото и ќе продолжи да се провлекува и во иднина. Не може сосема да исчезне, но колку повеќе децата, родителите и наставниците се едуцираат , толку повеќе ќе можат да се спречат или минимизираат ваквите појави кои во детските души оставаат длабоки траги, вели Анета Јованоска од Црвен крст Охрид.

На работилницата стана збор и за мерките кои треба да се превземат доколку се открие случај на злоупотреба, како и каде и од кои институции да се побара помош.  На неа беа поканети да учествуваат директорите на училиштата во општина Охрид и Дебрца, стручните служби при образовните установи, претставници од родителите и наставниците.

Проектот се спроведува од страна Црвениот крст во соработка со министерството за труд и социјална политика.

OhridNews