Делегација на општинската организација на Црвен крст – Охрид денеска положи свежо цвеќе пред споменикот на Анри Динан, основоположникот на Црвениот крст и Црвената полумесечина. 
Во рамките на одбележувањето на роденденот на Динан, 8 мај, потпретседателката на Охридскиот Црвен крст, Весна Терзиоска информира дека се предвидени низа активности.
За вторник предвидена е крводарителска акција во Факилтетот за туризам и угостителство наменета за студенти и за сите граѓани, среда ќе биде инфо ден кога пред дечињата од градинките и сите заинтересирани граѓани ќе ги промовираме нашите активности и на 14 мај во сабота ќе имаме голема хуманитарна акција, а собраните средствата ќе бидат донирани за деца од социјално загрозени семејства и мигранти од Украина, изјави Терзиоска.
Како организација имаме многу алатки за регрутирање на млади лица волонтери и навистина постои интерес за волонтирање во нашата организација, но и се обидуваме да ги задржиме и да им ги дадеме потребните алатки за да може да функционираат и да направиме подобро општество за сите, додава Терзиоска.
Интересот е голем. Во моментов тече проектот на ПХВ, каде младите изработуваат проекти со кои ќе се помага на социјално загрозените семејства, ја подигнуваат еколошката свест и го градат интеркултурното општество преку промоција на мир и соживот, вели Терзиоска.
Потенцира дека бистата на Динан во Охрид е единствена во државата, донесена од неговото семејство од Женева, а во следниот период делегација од ОО Црвен крст Охрид ќе оди во посета на Женева за да оддаде благодарност за донацијата.
Инаку, Анри Динан е основоположник на Црвениот крст и Црвената полумесечина, роден е на 8 мај 1828 година.
Н.С.Ј
