На Охрид како туристичка дестинација, му треба поинаков концепт на производство, понуда и промоција на храната, што во суштина ќе содржи квалитет, што ќе придонесе за бројни придобивки како на страната на понудата, така и кај побарувачката, вели проф. д-р Ангела Паскуале, лидер на конвивиумот Слоу Фуд – Охрид. Слоу фуд концептот,  кој е светски тренд, не подразбира национални јадења и традиционална кујна, туку покриеност на микро регионот со локални намирици и храна која минува нула километри до конзументите, односно таму каде што се произведува таму и се продава, додава таа.

Најважно е самите производители да го имаат најголемиот бенефит, а купувачите да добијат вистинска вредност. Тоа подразбира храната да биде органски одгледана, да не ја загадува животната средина и да биде добра, што значи кога ја јадеме храната да ни биде пријатно чувството, да ни ги гали непцата и да имаме едно доживување кое не се заборава. Сето тоа пропратено со убав амбиент, убава атмосфера и убави луѓе е филозофијата на слоу фуд концептот, кој сосема се разликува од фаст фуд кој е одлика на брзиот начин на живот, појаснува професорката Паскуале.

Охрид е град кој треба да се развива во насока на Слоу – фуд град. Треба да го искористиме природното и културно наследство, а храната е културно нaследство која е многу моќен инструмент за идентификување и обележување на нашиот локален идентитет. Специфична цел ни е да направиме поврзување меѓу членовите во Конвивумот и меѓусебна промоција на производите и соработка, но и да ја начнеме соработката со угостителските објекти со цел да се презентираат локалните производи, значи афирмирање на нашата туристичка дестинација со едно гастрономско брендирање. Во Општина Охрид има проект кој се вика „Купувај локално“ за промоција на наши локални производи во маркетите. На ваков начин заеднички би можеле да ги промовираме и пласираме производите, вели Паскуале.

Новина во моментов е изработката на подарок кутии со автентични производи, кои може и да се порачаат и достават.

Општината е подготвена да соработува со нас. Со мала поддршка на малите бизниси ќе ја зачуваме традицијата, Охрид ќе понуди нешто автентично, а ќе ги вратиме и парите во нашиот регион, потенцира Паскуале.

Конвивиумот Слоу Фуд Охрид формиран во февруари оваа година неодамна го реализираше и својот прв настан „Вкусете го Охрид локално“, каде покрај членовите од градот, учествуваа и членови од други конвивуми.

Меѓу успешните приказни презентирани беа винаријата мал „Св. Климент“, макалото од лук од Papas food-Охрид, штандот со фамилијарниот натпис Бачевски каде беа презентирани микробилките кои Сања Бачевски ги негува со својата љубов и охридското сонце, домаќинството „Пирустија Неданоски” со силната жена Наташа која плени со својата оригиналност, Весна Миленкоска која успева да направи многу вкусен леб односно уметничка креација само од брашно, вода, сол, без квасец со ферментација бавно 24 часа, пицата Македонка (Охридска) подготвена од исклучиво локални продукти од Pizzeria Prova и пица мајсторот Марко, охридски хамбургер од Bro’s Burger Station, потоа здравиот сендвич со печено месо кое се подготвува бавно и се служи во домашен леб, подготвен од Бре’д “Comfort food”, Sezer’s Organic Farm каде се произведува артичока и намаз од артичока, аспарагус, органски зеленчук и овошје, потоа нутела, односно домашен путер од лешник, збогатен со чоколадо и мед, а најважно без палмина маст од шеф Пеце Клечкароски, ладно цедено масло од лешник кое што го произведуваат фамлијата Перески коешто содржи многу Омега 3 масни киселини, како и фамилијата Су со тазе мелено турско кафе подготвено на песок и послужено во убав сет за кафе, додава Паскуале.

„Вкусете го Охрид локално“

Приказната на Димитар Јовчески – Мики, творецот на Papa’s food, има корени од село Трпејца каде тој и неговата сопруга Наташа, која е од тој крај, започнале од малиот рибен ресторан во кој стари жени го правеле сега веќе добро познатото охридско макалото кое сега тие го произведуваат. Вели учел, но и екпериметирал додека не го постигнал посакуваниот норматив да може да им се допадне на  конзументите.

Почнав да го пакувам во мали тегли. Во периодот на Корона кризата доста се конзумираше. Во неговиот состав нема никави конзерванси, содржи сол, сончогледово масло, црвена винска киселина, лук. Годинава прв пат ќе биде со 100% домашен лук од село Орман, од земјоделец кој го поттикнавме покрај останатиот вид на зеленчук да одгледува и лук. Се насочивме да го продаваме во охридскиот регион, но со оглед дека овој производ не можеше да стигне до туристите отворивме и продавница Papa’s food. Охридското макало го имаме обично и во две други форми со лешник и ореви кои исто така се локални производи. Лешникот е органски со сертификат набавуван од Дрслајца. Губите и тараната, пак се нешто што традиционално се правело во Трпејца и ги правиме и ние, со тоа нудиме и македонска паста која одлично оди во комбинација со макалото. Нашата продавница спонтано ја нарекоа прва македонска сувенирница за храна, каде може да се дегустираат и купат локлани производи од мали производители. Тука можат туристите за кратко време да ги вкусат и Охрид и Македонија, од вина до макала, вели Јовчески.

Додава дека во Охрид како Слоу фуд ќе се насочат и кон туристите. Целта е да се презентираат автохтони производи и тоа да биде и во период вон летната сезона, на пример околу Нова година и Божиќ. Да им се овозможи на посетителите во Охрид да ја вкусат цела Македонија.

Најважно е што и луѓето кои ќе го купат производот од овие мали производители знаат точно од каде доаѓа производот, како е одгледан, кој е добавувачот. Кога ќе го пробате производот знаете дека нешто уникатно пробувате, вели Јовчески.

Сања Бачевски во 2019 година започнала со производство на микробилки. „Бидејќи е нешто ново и кај нас и на Блаканот, истражував околу една година и за време на ковид кризата со оглед дека се застана, па и работата не се одвиваше како што очекував, го искористив периодот за прмоција, воведување на нови врсти на микробилки и проба“, раскажува оваа успешна локална производителка.

Микробилките се нешто поголеми од никулци, а помали од бејби зеленчук и во таа фаза содржат најмногу витами, минерали. Сите нутритиенти кои ги содржат истите билки кои се големи. Имам десетина различни врсти и во план имам воведување и на нови. Засега имам пченка, сончоглед, три врсти на ротквици, црвена зелка и друго, кои најважно е да се користат во свеж облик и со секое јадење. Многу важно е што се 100% органски бидејќи се користи семе за микробилки и се одгледуваат без никакви хемиски препарати, освен вода. Процесот на производство во просек трае од 7 до 10 дена зависно од видот. Некоја супер храна како што ја нарекуваат во светот, а која е релативно нова. Свежа храна во која се концентрирани многу нутритиенти, потенцира Бачевски.

Вели дека во наредниот период е добро да се поработи на едукација на луѓето за тоа што е добра и здрава храна, особено во училиштата, како и што се произведува, за од мали нозе да почне да се негува овој вид култура.

Моментално во Слоу Фуд Охрид има 16-17 членови. Заеднички се сложуваат дека гласот на локалното заедички е помоќен од гласот на поединецот.

Н.С.Ј.