Охридските пратеници д- р Сашо Василевски и Александар Николоски денес остварија средба со раководството на „Охридско лето“ со цел, на неколку дена до почетокот на фестивалот,  да добијат информација околу текот на подготовките за најновото издание.

– Со задоволство можам да кажам дека „Охридско лето“ годинава ќе брилира со програмата која е предвидена. Ветеното околу изградба на покривните конструкции успешно е реализирано со што фестивалот доби сцени според светски стандарди. Идната година е предвидено и уредување на просторите околу сцените, изјави пратеникот Сашо Василевски.

Пратеникот Александар Николоски потенцира дека заложбите на охридските пратеници во наредните 4 години ќе бидат во насока на подршка и развој на културата во Охрид.

– Ветуваме дека ќе се залагаме Охрид да добие репрезентативен затворен објект  за потребите на иституциите од областа на културата. Постојниот простор, да се надгради, модернизира и Охрид ,Охридско лето, Библиотеката и Театарот  да добијат една поубава и порепрезентативна зграда, рече Николоски.

Директорката на „Охридско лето“, Елизабета Јанкулоска потенцира дека подготовките за фестивалот течат според предвиденото и дека со подршка на надлежните државни институции биле исплатени долговите на националната установа.

– Во изминатиот период се концентриравме на две полиња- средување на сите прашања поврзани со финансиските обврски на установата, како и на реализацијата на уште поуспешна програма. „ Охридско лето“  започнува една нова приказна, квалитетна и врвна програма , светска сцена и услови за настап, рече директорката Јанкулоска.

Јанкулоска потенцира дека по настапот на врвните реномирани уметници на фестивалот, светските ѕвезди го гледаат Охрид поразлично- како место на кое е предизвик да се учествува.

Најновото, 54- то издание на фестивалот „Охридско лето“  на сцената на Антички театар ќе биде отворено на 12 јули со голем спектакл на оперската дива, Барбара Фритоли, и еден од најголемите баритони на денешницата, Лео Нучи, во придружба на Македонската филхармонија.

Во текот на фестивалот на сцената на Антички театар ќе се одржат и низа други концерти кои се очекува дека ќе го привлечат вниманието на публиката. Меѓу нив е и најавениот спектакл, настапот на феноменалниот интернационален вокално-театарски перфоманс, The Voca People, кој ќе се одржи на 1-ви август .

Т.К.