Со волонтирање до работа

Проектот за посредување при вработување, наменет за млади до 35 години со средно и високо образование е во полн ек. Целта на проектот е да се поттикне вработувањето на младите и да се воспостави врска помеѓу бизнис секторот и квалификуваниот кадар. Триесетина млади луѓе од градов веќе волонтираат еден месец (некои и подолго) во фирми и установи кои беа заинтересирани за вработување на соодветни кадри. Денес во малата сала на Општината се одржа работилница на која се одржаа неколку предавања, се разменуваа искуства и се даваа некои насоки за понатамошни активности за што поголема успешност на проектот.

Да потсетиме, Проектот кој започна минатата година, во ноември, со цел посредување при вработување е финансиран од УНДП Македонија и владата на Кралството Норвешка. Во тек е втората фаза од проектот во траење од три месеци (волонтирање), а од организаторите, Секторот за економски развој, дознаваме дека интересирањето на фирмите за вработување на кадри било поголемо од очекуваното.

Најмногу пријавени кандидати има со завршен Факултет за туризам (неповолен однос во поглед на побарувачката, многу пријавени – малку работни места), а најмалку од техничките и машинските струки (факултети).

„Не можеме да загарантираме некому сигурно вработување, но ќе сториме се` на волонтерите да им помогнеме најдобро да се претстават, да се вклопат и да покажат добри резултати на потенцијалното работно место со што би ги зголемиле шансите за свое вработување“, меѓу другото изјави Александар Гумберовски, проект менаџер.

Проектот завршува во јуни оваа година и за да биде успешен потребно е најмалку 16 волонтери (од 30) да засноваат некој вид работен однос со фирмата (установата) во која волонтираат.