Загрижувачки информации за можни малверзации на натреварите на охридскиот фудбалски второлигаш кружат во јавноста, предупредува Локалната самоуправа, која најави дека ќе го преиспита својот однос кон клубот на кој градот му помага во обезбедување услови и средства за функционирање и натпреварување.
Градоначалникот Петрески вели дека е непријатно изненаден од таквите гласини, кои доколку се обистинат, ќе му нанесат сериозен удар на угледот на охридскиот фудбал и воопшто на градот. Тој истакна дека општината сериозно ќе го преиспита односот кон ФК Охрид, затоа што не сака да биде инволвирана во заткулисни игри кои немаат ништо заедничко со спортот. Петрески очекува надлежните институции и спортски асоцијации да ги испитаат гласините за наводни манипулации поврзани со обложување. Доколку, сомнежите се потврдат, градоначалникот најави дека општината ќе ги прекине сите односи со ФК Охрид до целосно расчистување на евентуалниот случај, и дека за се ќе бидат информирани УЕФА и ФИФА.
Инаку, ФК Охрид во последниот натпревар пред својата публика во есенскиот дел од шампионатот во Втората лига, кој наместо во вообичаен термин во викенд, се одигра вчера, загуби на домашен терен од Новаци со 1:4.
OhridNews
