За свирепо убиство на српскиот турист Дејан Новаковиќ се обвинети две лица од Охрид, а уште едно се товари за помагање по извршено кривично дело. Истовремено за свирепо убиство пред Основниот суд во Охрид се води процес и против уште едно лице државјанин на Република Србија, кој засега е недостапен за органите на прогонот.
Според адвокатите на одбраната, квалификациите во обвинението се претешки и неиздржани, што како што велат, ќе се докаже во текот на доказната постапка.
– Квалификацијата е предимензионирана и доказите ќе укажат дека таа е престрога, изјави адвокатот Воислав Димоски.
Пред судот прв исказ даде обвинетиот Митре К., но поради одлуката на судијката Милка Танеска да го почне судењето во помала судница новинарските екипи не присуствуваа во салата. Внатре беа само роднините на убиениот српски турист, а не и блиските на обвинетите што предизвика негодување кај нив.
– Никој не знае што се случило тој ден , но никој однапред не може да прогласи убијци или Охрид да го прогласи за несигурен град, изјави Иљо Димов, вујко на обвинетиот Митре К.
Објективно и правично судење бара и мајката на убиениот српски турист. „Дејан е претепан со 40-на удари и очекувам дека судот на сторителите на ова дело ќе им изрече максимални казни“, рече Јулијана Зубовиќ, мајка на Дејан Новаковиќ.
Судскиот процес за убиството на српскиот турист Дејан Новаковиќ, ќе продолжи на 24-ти февруари со распит на обвинетите и сведоци.
