На денес одржаната седница, од страна на советот на општина Охрид беа формирани новите работни тела. Советниците ги изгласаа предлог одлуките за формирање на Статутарно – правната комисија, Комисијата за верификација, избори и именувања,  за финансии и буџет, комунални дејности, урбанизам,  општествени дејности,  за туризам и локален економски развој, за заштита на животната средина, Комисијата за месна самоуправа,  за одбележување празници и манифестации и доделување на награди и признанија, Комисијата за еднакви можности меѓу мажите и жените и Комисијата за малди и спорт.

По предлог на советничката група на ВМРО- ДПМНЕ, дневниот ред на седницата беше дополнет со уште една точка- Барање до градоначалникот Никола Бакрачески за информација за состојбите со паркирањето во централното градско подрачје.


–  Бараме од градоначалникот  да не информира околу случувањата со паркинзите ,бидејќи  ние како советници треба да ги следиме барањата на граѓаните со кои сме во секојдневен контакт и наша задача е да помогнеме и да овозможиме  полесно живеење во градот, изјави координаторот на советничката група на ВМРО- ДПМНЕ, Сашо Донев.

Предлогот за доставување на барање до градоначалникот Бакрачески беше прифатено и од страна на опозицијата, од каде потенцираат дека се потребни повеќе одговори и пред се образложение околу  отстранувањето на рампите и бетонските топки, забраната за возила на „Кеј Маршал Тито“, потенцирајќи дека ваквите потези не се во согласност со постоечкиот режим на сообраќај.

– Не сме информирани зошто е тоа направено,ниту  по чие барање. Обично се ставаат пречки за да се регулира сообраќајот и за да се зголеми бебзедноста. Со нивното отстранување, пред се ќе дојде до зголемување на брзината со која се вози. Не сакаме да прејудицираме и ќе почекаме да се стави предлог  новиот режим на сообраќај на една од  наредните седници, вели координаторот на советничката група на СДСМ, Томислав Тунтев.

На денешната седница беше извршена и верификација на советничкиот мандат на советникот Кујтим Усеини.

Следната седница на советот е закажана за во четврток, 2- ри мај, кога ќе се расправа околу предлог- одлуката за усвојување на Годишната  програма за поставување на урбана опрема за 2013 .

Т. К.