Селекцијата домаќин на Мундијалот, Бразил најавува поход кон титулата која до сега дури пет пати стигнувала во „жолтите“ витрини.
Нивната задача почнува од дуелот со Хрватска на премиерниот натпревар од јубилејното 20-то Светското првенство во фудбал.
– Ова е наше Светско првенство. На сите бразилци сакам да им кажам дека времето дојде и сега на нас е редот. Имаме седум чекори кои мораме да поминиме, но ние ќе одиме чекор по чекор. Прв ривал ни е Хрватска, а потоа ќе мислиме на наредните шест – потенцираше селекторот на „кариоките“, Луис Филипе Сколари.
Еден од адутите на бразилците е фудбалерот на Барселона, Нејмар од кој (ќе) зависат многу работи во бразилската селекција. Тој е свесен за животната шанса која им се пружа на репрезентативците.
– Нестрплив сум до почетокот на натпреварот, а исто така и среќен што сме тука. Сакам сега, веднаш да почне натпреварот и да истрчаме на теренот. Искрено се надевам дека можам да и помогнам на селекцијата и сите заедно да ги исполниме нашите и соништата на навивачите – истакна Нејмар.
Последен пат „кариоките“ на титулата од Светското првенство се радуваа 2002 година на Мундијалот во Јапонија и Јужна Кореја.
Мх.П.
