Членовите на Спортското риболовно друштво  „Свети Апостол Петар“ доаѓањето на пролетта го означија со акција за чистење на каналот Студенчишта од изумрената плашица, која и по изминати неколку недели од поморот сеуште се наоѓа во каналот.

– Над 90% од каналот сега нема ниту флора, ниту фауна, што претходно се нема случено. Наше барање е околу Билјанините извори да се прогласат три заштитни зони во кои би се забранила било каква урбанизација и градење на објекти. Ова што сега протекоја изворите е поигрување со животот на плашицата, дали поради  лошо менаџирање или  пак нечии политички игри поради кои изумреа над 10 тони плашица, рече претседателот на „СВ. Апостол Петар“, Радован Димитриески.


Спортските риболовци апелираат надлежните што поскоро да превземат мерки за спречување на понатамошен помор на плашицата, како и за отстранување на изумрените единки за да не дојде до ширење на зараза.


– Во секоја нормална држава ова би било аларм под итно да се превземе нешто, а овде надлежните креваат раце. Сега настапува топол период и рибните болести лесно се пренесуваат од една на друга единка во езерото со што може да се прошири заразата, потенцира спортскиот риболовец, Борис Георгиевски.


Од страна на СРД Св. Апостол Петар постојано се апелира до надлежните да ја исчистат угинатата плашица од каналот за да се спречи еколошката катастрофа до која би можело да дојде поради распаѓањето на плашицата што е пак извор на бактерии кои преку домашни миленици, птици и  глодари можат да предизвикаат разни болести кои може да се пренесат низ целиот град.

OhridNews