Здружението на рекреативни риболовци „Св. Апостол Петар“ од Охрид, распиша конкурс за доделување плакети за „Трајно уништување на рибниот фонд“.
„Наградите“, како што информираат од здружението ќе бидат објавени на Денот на рибарите – 12 јули.
– Конкурсот опфаќа повеќе области како: уништување на флората и фауната на Охридско Езеро и неговиот слив, уништување на канал Студенчишта (зимувалиште на риба старо со милиони години), зимувалишта во селата Пештани, Радожда, Трпејца, Градско пристаниште, уништување на Студенчишко блато, како и други области од рибарство , екологија и за идни проекти кои ќе придонесат за доуништување на флората и фауната. На избраните кандидати од Комисијата освен Плакета ке им додели и уметничка слика од охридска пастрмка, а ќе биде доделена и плакета за животно дело: „Уништување на флората и фауната во Република Македонија“. – информираат од здружението „Св. Апостол Петар“.
Оттаму додаваат дека конкурсот е меѓународен, а предвид ќе се земат сите дела направени од 1991 година до сега како и предвидени проекти за доуништување на флората и фауната во Македонија.
OhridNews
