Срцево-садовите заболувања се водечка причина за смртност во светот. Според податоците на Светстката здравствена организација, секоја година од болести на циркулаторниот систем умираат околу 17 милиони луѓе. Во Европа околу 50% од сите смртни случаи, се предизвикани од овие заболувања. Се повеќе заболуваат лица под 65 години возраст, односно лица во најпродуктивниот период од животот. Доколку не се преземат соодветни мерки до 2030 г., 23,6 милиони луѓе, секоја година ќе умираат од срцево-садови заболувања (главно од срцеви и мозочни удари).
Статистичките податоци за Македонија покажуваат дека срцево-садовите заболувања се водечка причина за смрт и кај нас.
Здебеленост, неправилна исхрана, пушење и физичка неактивност се водечки причини за болестите на срцето и мозочните удари кои можат да се забележат во се помлада возраст. Таквите нездрави навики и животен стил се се почести меѓу децата и адолесцентите. Токму тоа е период кога со навремени и соодветни постапки може да се насочи развојот на детето во зрела личност, одговорна за своето здравје, здравите животни стилови и со фактори на ризик сведени на најмала можна мерка.
Со цел подигање на нивото на свеста кај населението, особено кај младата популација за опасностите од срцево-садовите заболувања и мозочните удари, како и за значењето на здравиот начин на живеење за здраво срце, Црвен крст Охрид ја одбележува “Неделата на срцево-садови заболувања” од 21-28 февруари под мотото “СОЧУВАЈТЕ ГО ЗДРАВО ВАШЕТО СРЦЕ И КРВНИТЕ САДОВИ!”. Посебен акцент во активностите ќе биде ставен на вештината на укажување прва помош како безбедносна мерка при срцев напад и мозочен удар.
Во текот на Неделата на срцево-садови Црвениот крст Охрид ќе реалзира типизирани едукативни предавања во основните и средните училишт. Исто така ќе организира и јавно предавање за ризик факторите за болестите на срцето и крвните садови и презентација на техники за укажување на прва помош при срцев напад и мозочен удар, што ќе се одржи во просториите на – Црвен крст Охрид на 25.02.2010 (четврток), 19:00 ч. Во рамки на кампањата во соработка со Центарот за јавно здравје Охрид на плоштадот кај Чинарот во петок-26.02.2010, ќе биде организирана акција при што граѓаните ќе можат бесплатно да се прегледаат и да измерат крвен притисок, холестерол и шеќер во крвта.
