Ристе Стефанов, кој последен се приклучи во подготовките на македонската сениорска кошаркарска репрезентација, вели дека со пожртвувана работа ќе се обиде да го надомести загубеното. Стефанов се појави во стројот и својот прв настап во репрезентативниот дрес летово се очекува да го има следниот викенд на турнирот во Германија. Ексбекот на Лукоил Академик е свесен за пропуштеното на подготовките за ЕП во Полска (7-20 септември).


– Во секој случај ќе ми недостигаат тие подготовки што екипата ги имаше на Златибор и Крањска Гора, но што е тука е, и сега мора да се фокусирам на она што следува. Повредата ме спречи да тренирам, но ќе се обидам да ја вратам формата и да им помогнам на моите другари како на турнирите во Германија и Турција така и на ЕП во Полска. Сметам дека има уште доволно време да се подготвам и да го дадам максимумот во националниот дрес – ни рече Стефанов .

Селекторот Јовица Арсиќ сега конечно може да смета на сите планирани кошаркари и да почне посериозно уигрување на екипата.

 – Се’ уште заостануваме зад оној зацртан ритам бидејќи подготовките не ги почнавме комплетни. Предност е тоа што долго сме заедно, па уигрувањето на тактичките комбинации е полесно. Важно е да го вклопиме и Дариус Вашингтон кој за прв пат е во тимот, а лесно може да се случи да биде и дел од тимот во Полска – изјави Арсиќ, кој за 20-ина дена треба да одлучи кој од двајцата Американци со македонски пасош ќе игра на Евробаскетот.

Со Вашингтон и Стефанов, бековската линија ќе биде многу посилна отколку на претходните пријателски средби.
– Ристе заостануваше во голема мерка со подготовките, но последните тренинзи ги одработи со силно темпо па очекувам до мечевите во Полска да биде подготвен – вели селекторот.

По подготовките во Охрид, репрезентативците се селат во Скопје каде што ќе останат до патувањето за Германија. Арсиќ најави дека се’ до заминувањето во Германија, ќе се работи со сите 17 кошаркари, додека пред заминувањето на „Президент купот“ списокот ќе биде скратен на 15, а конечниот за ЕП ќе го објави пред самото заминувањето во Полска.
М.П.