Андреј Стојаноски од ПК Акватик во машка и Русинката Александара Умурзакова во женска конкуренција се победници на 33 издание на Илинденскиот куп, што се одржа во водите на Охридското езеро.
Стојановски патеката долга 2,5 километри од Горица до градското пристаниште ја преплива за 29.19,20 минути. Втор на целта пристигна Александар Иливски од ПК Студент со време 29.29, 64, додека место на подиумот избори уште Миро Крстевски од ПК Скопје со време 30.34, 39 минути.
– Среќен сум поради триумфот во Охрид. На овој маратон победувале македонски пливачи кои потоа имале одлични кариери. Драго ми е што и јас сум сега еден од нив – истакна Стојановски.
Најбрза во женска конкуренција беше Русинката Александра Умурзакова од Олимпик Новоросиск, кој настапи во трката под 16 години. Таа делницата ја преплива за 30.47,36 минути.
– Ми се допадна. Убаво искуство во Охрид, водата не беше ладна и беше пријатно да се плива. Доколку сум во можност ќе дојдам и в година да го одбранам трофејот – рече Умурзакова.
Втора на подиумот во женска конкуренција се искачи Ангела Ниниќ од ПК Делфин со време 31.19,60 , додека трета во генералниот пласман заврши најбрзата во првата трка Атанасова Елена од ПК Вардар со време 32.01,42 минути.
По подолго време на малиот маратон настапија и охриѓани. Нив ги предводеше Димчески Александар од Стрмец.
На овогодиншениот Илинденски куп настапија 44 натпреварувачи во двете категории.
М.П.
