Во Охрид за прв пат се организира групно венчавање, кое свештениците на Дебарско – кичевската епархија го извршија бесплатно.
– Денес во градот Охрид е празник, затоа што многу брачни парови кои од различни причини до сега не се венчале имаат прилика да го направат тоа и навистина чувството на радост е големо и ние како свештеници тоа го чувствуваме, изјави отец Сашо Богданоски.
На групното венчавање присуствуваа брачни парови од Охрид но и од други градови во земјата. Имаше парови од сите генерации, а меѓу највозрасните беа охриѓаните Надежда и Славко Бежовски, кои се венчаа во црква по половина век брак.
– Во комунизмот работев во внатрешни и немаше никаква можност да се венчаме, па одлучивме сега на стари години да се венчаме Црквата ни излезе во поресрет и решивме да го направиме тој чин иако сме веќе 52 години во брак, истакна „младоженецот“ Славко. Сопругата Надежда беше среќна што љубовта со својот животен сопатник ја овековечува и пред Бога. Венчавката, како што истакна таа, ќе ја прослават во домашна атмосфера со најблиските.
Во црквата Св. Ѓорѓија владееше свечена атмосфера. Специјално за групната венчавка волонтерите од оваа црква рачно исплетија 80-на цветни венци кои младенците ги носеа наместо круни.
– Воопшто не беше тешко да се изработат цветните венчиња кои ги симболизираат венчалните круни, а се исплетени од бршлен и хризантеми, истакна Марија Кочоска, волонтер во црквата Св. Ѓорѓија.
Граѓаните ја поздравија иницијативата на Црквата со која на верниците кои од различни причини досега не се венчале им се овозможи бесплатно да го направат тоа.
