Пазарната инспекција во Охрид е без работа по воведување на Законот за заштита од пушењето. Инспекторите кои ги сретнавме во една од охридските кафеани велат дека до сега законот го почитуваат сите. Угостителите имаат истакнато знаци за забрането пушење, а пушачите својата страст ја задоволуваат надвор од угостителските објекти. Во тоа се уверивме и сами. Во неколкуте локали кои ги посетивме пушачите од време на време излегуваа да запалат цигара пред објектот, па повторно се враќаа да си го допијат пијалакот. Велат дека законот е дискриминирачки, но го почитуваат.


Цигара пред кафетерија – Законот за заштита од пушењето во Охрид се почитува

Охридските угостители најавија дека деновиве и официјално ќе обзнанат дали ќе се приклучат на 24 часовниот штрајк против Законот за пушење, за кој се жалат дека им го намалил прометот. Дел од охридските угостители со кои разговаравме најавија дека ќе ги затворат своите објекти во знак на протест заедно со колегите од сите градови, но сметаат дека протестот ќе има ефект само доколку тоа го направат сите угостители.

Г.М.