Струшката локална самоуправа во текот на наредната година планира да изготви Стратегија за развој на туризмот во Струга. Ова е предвидено во „Програмата за општа туристичка пропаганда и подобрување на условите за престој на туристите во 2015 година“, која беше усвоена на 21-та седница на Советот на општината. Според предвиденото, за оваа намена од Буџетот за 2015 година ќе бидат издвоени околу 3.500 евра или 215.000 денари.
Покрај изготвувањето на стратегијата, општина Струга планира и 14 други мерки за развој на туризмот, за чие спроведување ќе потроши 98.000 евра или точно 6.009.000 денари.
За промоција на Струга на 15 различни портали на албански и македонски јазик во оваа програма предвидени се 1,5 милиони денари, а за реклами на национални и локални медиуми планирани се 360 илјади денари. Околу 12 илјади евра или точно 783.000 денари ќе бидат издвоени за основање на Туристичко биро во Струга, а за учество на домашни и меѓународни саеми за туризам ќе бидат потрошени околу 8.900 евра или вкупно 547.000 денари.
Во 2015 година, за организирање на саеми и конференции во Струга се предвидени вкупно 597 илјади денари, а за поставување на промотивни билборди во земјава и странство ќе бидат потрошени околу 4.000 евра или 250 илјади денари.
Исто така во Програмата за туризам за 2015 година планирано е поставување на привремени туристичко-информативни центри на три локации во Струга како и поставување на туристичка сигнализација на територијата на целата општина. Во делот на туристичката пропаганда ќе бидат издвоени и средства за подготовка и печатење на промотивни материјали и за создавање и одржување на веб-страница и андроид апликација за туризмот во Струга.
OhridNews
