Струга е една од шесте нови општини кои во иднина самостојно ќе управуваат со државното градежно неизградено земјиште. Освен Струга со државното земјиште ќе можат да управуваат и Струмица, Делчево, Виница и скопските општини Карпош и Кисела Вода.
Ваквата одлука на министерството за транспорт и врски следува по разгледувањето на поднесените барања на општините од страна на Комитетот за градежно земјиште, кој утврдел дека тие ги исполнуваат законските услови за да го преземат процесот на управување со градежно земјиште.
Наведените шест општини ќе можат да го преземат управувањето со градежното земјиште откако одлуката ќе биде донесена на Влада и објавена во Службен весник на Република Македонија.
Општина Охрид засега не се наоѓа меѓу општините кои имаат можност да управуваат со неизградено градежно земјиште. Првите неколку општини кои се стекнаа со вакво право беа општините Берово, Кочани, Илинден, Пробиштип, Штип, Гевгелија, Битола и Демир Капија.
Од 1 јули годинава согласно Законот за градежно земјиште општините кои ќе ги исполнат условите и ќе го воспостават системот за реализирање на електронски јавни наддавања можат да добијат соодветно овластување со кое ќе можат да ги водат постапките за отуѓување на неизградено градежно земјиште по пат на електронско јавно наддавање. Општините треба да имаат развиено и усвоено годишна програма за управување со државно градежно земјиште, минимален број на лиценцирани општински службеници и воспоставен систем за електронско наддавање и комисија за јавно електронски наддавање.
