Вевчанци велат дека испадите во електричната мрежа поинтензивни се во зимскиот период, а кулминирале деновиве со неколкучасовен прекин во снабдувањето. Поради проблемите со струјата отежнато се одвива наставата во основното училиште и градинката каде има околу 300 деца.
– Прекините во снабдувањето со електрична енергија се одразуваат на наставата. Учениците секојдневно отсуствуваат бидејќи не може да се изведува нормална настава и доколку не се реши проблемот нема да можеме да ја реализираме зацртаната наставна програма, ни изјави Марјан Костојчиноски, директор на основното училиште „Страшо Пинџур“.
Со проблеми со соочува и Здравствениот дом во Вевчани каде се лекуваат 25000 жители од околните населени места.
Според началникот д-р Боро Пешиноски, неколкучасовниот прекин во снабдувањето со електрична енергија деновиве ја блокирал работата на здравствениот дом.
– Поради недостиг на електрична енергија не работеше лабораторијата, рендгенот, не работеа ниту специјалистичките служби, интерното одделение и стоматологија, бевме комплет блокирани, иако имавме неколку итни случаи, изјави д-р Пешиноски.
Градоначалникот на Вевчани, Перо Илиески, вели дека граѓаните секојдневно се жалат до локалната самоуправа на проблемите со струјата, поради што се расипале и општинските компјутери.
–Дежурните екипи на КЕЦ Струга редовно интервенираат но тоа не го решава проблемот, кој се должи на застарената електрична мрежа во Вевчани која не е освежена 50 години, вели Илиески. Според него единствено решение на проблемот е обновување на застарената електрична мрежа во општината.
Од ЕВН Македонија изразуваат разбирање за проблемните со кои се соочуваат жителите на Вевчани во зимските месеци, но велат дека прекините во снабдувањето со електрична енергија не се така чести и се должат пред се на ниските температури и невремето поради кое на два пати дошло до испад на далновод. Портпаролот на ЕВН, Атанас Ковачески, не информира дека деновиве во Вевчани е испратена екипа на компанијата која врши инспекција на електричната мрежа. Тој посочи дека во Вевчани е изградена една нова трафостаница, а старите трафостаници како и дел од застарената електро мрежа се реконструирани. Компанијата најави дека ќе биде изготвен прокт за подобрување на снабдувањето со електрична енергија за поширокиот регион, со кој ќе биде опфатена и општината Вевчани.
