Во португалскиот табор на Европското првенство владее незадоволство од именувањето на Турчинот, Чунет Чакир, за главен судија на полуфиналниот натпревар меѓу Португалија и Шпанија, пренесува португалскиот печат.
„Португалија е згрозена: именувањето на Турчинот за главен судија е алармантно“, е насловот во влијателниот A Bola. Во текстот на весникот се тврди дека претседателот на Фудбалската федерација на Шпанија, Анхел Виљар, воедно е и претседател на Судискиот одбор на УЕФА, а дека претседателот на Одборот на УЕФА, турчинот Шенез Ерзик е „голем пријател на Барселона и УНИЦЕФ“.
„Ерзик е кадар на УНИЦЕФ и беше дел од преговорите по кои оваа организација на Обединетите нации стана спонзор на каталонскиот клуб“, пишува меѓу другото A Bola.
„Именувањето на турскиот судија за главен во полуфиналето со Шпанија не им се допаѓа ниту на челниците на Фудбалскиот сојуз на Португалија, од каде најавиле „дека ќе завземат јавен став“, додава весникот Record, според кого „Португалија се плаши од заткулисни игри и големото влијание на Анхел Виљар.
