Македонскиот народен театар синоќа на летната сцена Долни Сарај во Охрид, во рамки на фестивалот „охридско лето“, премиерно ја изведе комедијата „Свадбата на Фигаро“ во режија на Леван Цуладѕе од Грузија.


Во претставата која говори за љубовта, интригите и љубомората, настапија Нино Леви, Николина Кујача, Сашко Коцев, Сашка Димитровска, Славиша Кајевски, Драгана Костадиновска, Томе Витанов, Марија Новак и Кирил Поп Христов.



– Многу ни е драго што МНТ е тука на „Охридско лето“, најголемиот фестивал од тој вид во Македонија и во регионот и што во рамки на МНТ продолжуваме со тенденцијата на враќање на класиката односно убавиот збор, вистинските вредности, дела во театарот, значи малку да се подигне нивото на театарот во Македонија воопшто, рече директорот на МНТ Дејан Лилиќ, по повод премиерата на претатавата „Свадбата на Фигаро“.


Публиката во преполното гледалиште уживеша во изведбата на извонредната актерска екипа, занемарувајќи ги малите импровизации и ситни организациски пропусти, а прекрасната театарска вечер на моменти беше нарушена од силната музика која ечи од сите страни на Охрид.

Г.М.
фото: Емилио