Со повеќе манифестации СВР Охрид го одбележа Денот на полицијата 7-ми мај. Во рамките на одбележувањето на празникот, во Регионалниот центар „Запад“, беше остварена средба со ученици од ОУ „Братство“ како и со децата од детската градинка „Јасна Ристеска“.

– Во  просториите на СВР Охрид имавме средби со повеќе институции со кои имаме одлична соработка и денешниот ден беше вистинска можност уште еднаш да ја потенцираме нашата одлична соработка  и координација. Нашата цел е превентивно да се делува во сите сфери и се е поголемата желба за минимизирање на репресијата, ваквиот наш однос  се препознава кај  граѓаните и на овој празник за сите им искажувам благодарност за добрата соработка за наше општо добро – рече портпаролот на СВР Охрид, Стефан Димоски.

Од СВР Охрид ја потенцираа одличната соработка со Дирекцијата за заштита и спасување, за што признание му беше доделено на координаторот Љубе Матески.


– Оваа благодарница за мене претставува поттик да продолжам и понатаму да се занимавам со оваа проблематика. Откривањето на неексплодирани борбени средства и нивниот транспорт е доста опасна работа, како за тие што работат така и за тие што се среќаваат со оваа проблематика. Дирекцијата во соработка со МВР и понатаму ќе продолжи со планското работење на ова поле – истакна Матески.

На празникот на полицијата , традиционално беше избран најдобриот полицаец во СВР Охрид. Оваа година ова признание отиде во рацете на Владо Карадакоски . Најдобриот полицаец во 2010-та е припадник на СВР Охрид од 1999 година.


Најстариот и најдобриот полицаец – Вида и Карадакоски

–    Се гордеам со оваа награда и верувајте ми дека тешко е да се добие ова признание во Охрид, бидејќи конкуренцијата во секторот е огромна. Нашата цел е превентивно да се делува во сите можни случаи, за да сфатат граѓаните дека ние постоиме за нив. Оваа награда ќе делува мотивирачки за уште повеќе докажувања и сузбивање на сите видови криминалитет – потенцираше Карадакоски.


Началникот на СВР Охрид Стефан Буџакоски во разговор со Вида

На денешното одбележување на празникот присутен беше и еден од најстарите полицајци во Охрид Фикри Вида. Вида (84) полициската должност ја обавувал од периодот 1951 до 1972 година, а добитник е на медал за народот.

М.П.