СВР Охрид и полициската станица во Струга преземаат интензивни мерки за пронаоѓање на сторителот на казненото дело „убиство“, извршено вчера во 16 часот и 30 минути во ресторантот „Аква блу“ во Струга, при што од здобиените повреди од огнострелно оружје, во струшката Општа болница почина 55-годишниот Дилавер Бојку од Велешта.
Како што информира портпаролот на СВР Охрид, Стефан Димоски, Бојку на хируршкото одделение бил донесен во бесвесна состојба, каде од страна на медицинска екипа укажана е лекарска помош и по неуспешна реанимација, констатирана е смрт настаната од огнострелно оружје.
– На местото на настанот извршен е криминалистичко-технички увид предводен од Јавен обвинител при Основното јавно обвинителство Струга во содејство со полициски екипи. Притоа, констатирано е дека казненото дело е сторено на терасата од ресторантот „Аква блу“ каде седел сега починатиот Дилавер Б. Во негова непосредна близина се приближило засега непознато машко лице кое, во правец на главата му вперил пиштол и испукал еден проектил нанесувајќи му огнострелни повреди во пределот на темпоралната регија од левата и десната страна. Потоа, засега непознатиот сторител со трчање го напуштил ресторантот бегајќи кон улица „Партизанска“. Со цел да го фатат и задржат сторителот, по него се упатиле две лица, но истите се откажале од намерата откако засега непознатиот сторител и кон нив испукал два проектили, информира Димоски.
По наредба на Јавен обвинител, врз телото на сега починатиот ќе биде извршена обдукција.
OhridNews
