Директорка на ООУ „Св. Климент Охридски“-Охрид, Наташа Танеска, денес на прес конференција кажа дека просветните инспектори не утврдиле неправилности во нејзиното работење, откако Секретарот на Општина Охрид, Александар Китевски на 22.12.2021 година на одржана прес конференција информираше дека се детектирани неправилности во работењето на директорите во три основни училишта, меѓу нив и во „Св. Климент Охридски“, и дека очекува Државниот просветен инспекторат да излезе на терен да ги констатира истите.
По направен Вондреден инспекциски надзор од страна на Државниот просветен инспектор кој се спроведе во ООУ „Св. Климент Охридски” Охрид на ден 23.12.2021 година, не се најдени никакви нерегуларности во работењето на раководниот орган-директорот. Ваквите паушални изјави со цел манипулирање на јавноста преставуваат своевиден мобинг врз работењето на директорите и класична политичка хајка, за што ќе се побара одговорност од подносителот на ваквите клевети, рече Танеска.
Додаде дека новата локална власт врши притисок врз директорите на основните и средните училишта. 
Со доаѓањето на оваа локална власт на чело на Општина Охрид, освен притисокот кој се врши врз директорите на основните и средни училишта, немаме што да кажеме во однос на нивната работа и проектите кои секако ги немаат, а треба да ги реализираат, рече Танеска.
Побара Александар Китевски јавно да и се извини за сите невистини и лаги кои ги искажал за нејзиното работење како директор во ООУ „Св.Климент Охридски” Охрид, а понатака ќе следеле и соодветни тужби.
Н.С.Ј.
