Во врска со инцидентот кога заборавен мобилен телефон во авионот со кој за Истанбул требаше да лета претседателот Ѓорге Иванов, предизвика паника на скопскиот аеродром, со соопштение се огласи концесионерот „ТАВ“. Оттаму информираат дека авиосообраќајот на „Александар Велики“ функционира нормално, а скопскиот аеродром е отворен.
„Во текот на редовната безбедносна проверка на авионот за вчерашниот (23 ноември) вечерен лет кон Истанбул беше пронајден оставен мобилен телефон. Поради безбедносните правила на авиокомпанијата и одлуката на капетанот, леталото се врати во позиција на паркирање за да се изврши дополнителна контрола.
Ова е стандардна меѓународна процедура што се спроведува во име на безбедноста на леталата и на патниците. Поради неа, летот беше одложен. Откако сите услови беа исполнети, капетанот одлучи да продолжи со летот и авионот во средата во 22:56 часот полета кон Истанбул.“ – се вели во соопштението.
Од „ТАВ“ уште информираат дека малите одложувања на одредени летови видливи на аеродромската вебстраница се од вчераутро и истите се се резултат на густата магла и воопшто не се поврзани со одложениот лет кон Истанбул.
OhridNews
