Денес со почеток во 20:30 часот, на сцената на плоштадот „Вангел Наумоски“ (мини маркет) ќе биде изведена театарската приказна за најмладите „Разгаленка” во рамки на програмата на Општина Охрид „Културата расте со децата“.
Станува збор за комична претстава за деца која е од бајковит карактер. Главната улога е принцезата која е премногу разгалена и секогаш тоа што ќе го замисли сака да биде по нејзино. Мислејќи дека има право на се, таа само си прави лоши работи за на крај да го разлути нејзиниот татко кралот и тој да посака таа да не биде принцеза. Но, со помош на помошничката од кралството, животното – миленик на кралството и децата од публиката, кои се кралски советници, принцезата се променува бидејќи сите почнуваат да ја викаат Разгаленка. Таа тогаш разбира целосно што значи правото на детето, но и исполнување на обврските.
Низ многу комични ситуации, интеракција со децата, оргиналност во сценографија и костим „Разгаленка” ќе ги освои срцата на детската публика, велат организаторите.
Во претставата играат Ема Давчева, Сашо Ристовски и Магдалена Ризова – Черних, а истата е во режија на Сашо Ристовски.
Пред почетокот на претставата, со почеток од 19:00 часот ќе се одржи книжевен хепенинг со промоција на книги за деца и работилници.
OhridNews
