„Повеќе од четириесет години живеам во Охрид и вака низок водостој на Охридското Езеро не паметам“, вели наш постар сограѓанин, кого го сретнавме на градскиот кеј. Тој беше еден од многумината шетачи кои гласно размислуваа за опаднатото ниво на Охридското Езеро, какво до сега не се памети. Иако според надлежните се работи за природен процес, повеќе од очигледно е дека состојбата со водостојот на Охридското Езеро е загрижувачка. Најдобар доказ за тоа се фотографиите кои ги направивме вчера на градскиот кеј. Водата длабоко е повлечена од брегот, од дното се надѕираат камења, а под местот пред х. „Палас“ никнува трева.
Трева никна под мостот кај „Палас“
Прецизни податоци за моменталната состојба со водостојот нема. На официјалниот веб сајт на Управата за хидрометеоролошки работи, која единствено е меродавна за мерење на водостојот на езерата, последните податоци датираат од 11 септември кога бил измерен пад од 6 сантиметри под минималната кота која се наоѓа на 693,17 метри надморска височина. Зошто нема податоци за најновите мерења и на кое ниво сега е Охридскот Езеро не се соопштува.
Експертите велат дека опаѓањето на нивото на езерото е вообичаена појава, но опасно е доколку негативниот тренд се задржи подолго време. Тоа негативно ќе влијае на живиот свет во литоралот велат експертите од Хидробиолошкиот институт. Живиот свет во текот на еволуцијата создал одбрамбен механизам за заштита во сушни периоди, но доколку и натаму се задржи намалениот водостој може да има сериозни последци врз него, велат експертите. Намаленото ниво на езерото според нив ќе предизвика негативни геомеханички движења, а ќе влијае и на фрескоживописот во црквите.
Г.М.
