Силното невреме што попладнево го зафати Охрид ги спречи учесниците на 38. Охридски пливачки маратон да стигнат до целта. По 4,5 часа пливање трката беше прекината во 14:30 часот од безбедносни причини поради силните бранови, ветрот и грмотевици. Во тој момент во машка конкуренција израмнети на првото место беа италијаните Матео Фурлан и Федерико Тамборино и аргентинецот Матијас Диас Хернандес. Согласно пропозициите тројцата се прогласени за победници на маратонот.
На четвртото место се пласира уште еден маратонец од Италија, Марко Инглима, по кој следат Петар Цеков – Македонија, Хуго Риберо – Португалија, Александар Илиевски – Македонија, Акилјес Балудо – Аргентина и Леонид Мишевски – Македонија.
Во женска конкуренција водечка во времето на прекинот беше Мајте Ајлен Пука од Аргентина која е прогласена за победничка. Второпласирана беше нејзината сонародничка Ерика Јенсен, а трета Милица Љубисављевиќ од Србија. Четврта на прекинатиот маратон заврши нашата Росана Гошева пред Елена Лоенело од Италија и Алисја Гедриш – Полска.
На стартот на маратонот во Св. Наум ништо не навестуваше дека престижната спортска манифестација ќе добие ваков епилог. Времето беше сончево и речиси идеално за трка. Но, се’ се промени за триесеттина минути. Невремето проследено со силен ветар, дожд, електрични празнења и високи бранови какви што ретко се гледаат, почна околу 14 часот и засилуваше од минута во минута, поради што организаторот донесе одлука маратонот да биде прекинат, што се случува прв пат во седумдецениската историја на оваа престижна спортска манифестација.
Охридското Езеро пред и после 14 часот
Наградите на победниците ќе им бидат врачени на свечена церемонија што ја организира претседателката на Република Македонија Гордана Силјаноска – Давкова, која е покровител на Охридскиот пливачки маратон кој го помогнаа и Министерството за спорт, Општина Охрид, Пливачката асоцијалција на Македонија и спонзори.
Наградниот фонд на Охридскиот пливачки маратон оваа година изнесуваше 15 000 евра.
Г.М.
Фото: Анамарија Момироска
