Лидерот на Социјалдемократскиот сојуз на Македонија, Бранко Црвенковски, на митингот  што неговата партија синоќа го одржа во Штип, побара предвремени парламентарни избори, за излез од кризата во која земјата се најде под водство на Никола Груевски.

– Има два начини да ги смениме работите на подобро, да излеземе од овој ќорсокак и да тргнеме напред. Или на избори или од улица. Социјалдемократскиот Сојуз  е подготвен и за едното и за другото. Но заради државата, заради демократијата, заради внатрешната стабилност, заради меѓународниот углед, заради мирот и спокојството на секое наше семејство, заради нашите деца и нивната иднина најдобро е овој проблем да се реши на избори. -рече Црвенковски.

Тој ја обвини власта дека во речиси петгодишниот мандат не исполнила ниту едно од своите ветувања и ја оддалечила земјата од  НАТО и ЕУ.

– Што добивме после 5 години нивна власт?Добивме рекордна сиромаштија, рекордна невработеност, рекордно ниско ниво на инвестиции. Погледнете ги цените на струјата, на водата, на дрвата, на парното, погледнете ги цените на храната и средствата за хигиена и сами заклучете за колку ви е животот поскап и за колку вие сте посиромашни во овие пет години. -истакна Црвенковски.

Тој најави дека опозицијата веднаш после Самитот на ЕУ на 16ти декември во Собранието ќе поднесе иницијатива за гласање на недоверба на Владата и го повика премиерот Груевски доколку им верува на анкетите во кои се прикажува дека има голема предност над политичките ривали, да излезе на избори и да се соочи со народот.

OhridNews