Туристичкиот инфо-центар кој Општина Охрид го постави на влезот на булеварот ,,Туристичка”, наспроти бензинската пумпа на ,,Окта”, конечно ќе проработи. Според планираното инфо-центарот ќе започне да ја извршува својата функција наскоро односно пред шпицот на овогодинешната летна сезона.
Од Општина Охрид информираат дека активностите за уредување на основната инфраструктура на инфо центарот се веќе при крај и дека деновиве треба да се започне со уредување на внатрешноста на објектот и хортикултурно уредување на неговата околина.
-Со отварањето на инфо центарот, туристите ќе можат да ги добијат сите потребни информации на самиот влез во градот. Значи ќе можат да се запознаат со сместувачките капацитети на крајбрежјето, културно-историските споменици, места кои што може да се посетат, плажи, ресторани и слични информации. Освен за туристите, инфо центарот ќе биде од полза и за сите туристички чинители од градот, кои тука ќе може да остават свои промотивни материјали, велат од Секторот за туризам и локален економски развој при Општина Охрид.
Оттаму објаснуваат дека вакви информативни објекти, планирано е да бидат поставени и на плоштадот, непосредно до трговскиот центар „Летница“ и на влезот во Охрид од страната на Битола/
Инаку овие инфо-центри требаше да започнат со работа пред почетокот на изминатата туристичка сезона, но тендерот за набавка на куќичките задоцни поради предизборната кампања за Парламентарните избори.
