Кампањата „Фер туризам започнува со пријавен доход“ продолжува. По средбите со туристичкиот сектор во Охрид и Дојран, Управата за јавни приходи (УЈП) денеска беше во Струга, каде со туристичките работници разговараше за даночните обврски кои произлегуваат од работењето во туристичката сезона: пријавување на доходот од издавање апартмани, соби, куќи и вили; правилно ангажирање на сезонски и повремени работници; како и пријавување на доходот од дејности од времен карактер.
Овие и други прашања беа тема на отворениот разговор со издавачите на сместувачки капацитети, хотелиерите, угостителите и останатите претставници на туристичкиот сектор.
Целта на средбите е навремено информирање, разјаснување на дилемите и обезбедување практична поддршка за полесно исполнување на законските обврски, велат од УЈП.
Потенцираат дека со директната комуникација со туристичкиот сектор УЈП продолжува да придонесува кон поголема даночна информираност, намалување на сивата економија и создавање еднакви и фер услови за работа.
OhridNews
