Педесетина ученици од подрачното училиште во Косел, членови на еколошката секција , како и членови на литературната секција со напишани еко-пораки и еко-пароли на забележителни еко-транспаренти денот на пролетта го искористија во функција на будење на еко-свеста на сите чинители за одржување на здрава и чиста природа.
Имено, во рамките на одбележување на Денот на пролетта и екологијата, учениците од Косел , од најмалите до највозрасните активно и со голема грижа учествуваа во уредување на училишните дворови и пристапните патеки до училиштето, како и во освежување на заштитните метални и дрвени огради околу прозорците и училишните простории.
Додека малите од одделенска настава заедно со своите наставнички ги уредуваа ѕидните весници и ги “расцветуваа своите разгранети дрвца” нивните повозрасни другарчиња заедно со техничкиот персонал и наставниците учествувааа во “мајсторските работи” околу металните и дрвените огради.
Сепак, најинтересни и најзабележителни беа членовите на еколошката и литературната секција кои со соодветно функционални еко-транспаренти продефилираа низ селските улици и вдолж брегот на Коселска река, при што имаа задача да евидентираат несовесни и нееколошки постапки од несовесни граѓани на кои им доделуваа СИМБОЛИЧНИ КАЗНИ, а истовремено и да забележат убаво уредени дворови за чии совесни сопственици следуваа симболични и ВРЕДНИ НАГРАДИ.
Дел од членовите на еко-патролата беа во улога и на новинари кои ги анкетираа жителите на Косел ЗА СЕГАШНАТА ЕКО-СВЕСТ и за грижата за својата животна средина.
