Од понеделникот, зградата на поранешната Коселска општина, доброволно ги прими учениците од подрачното училиште во Косел кои за првпат ги “окупираа“ општинските простории и заедно со своите наставници следните три-четири недели ќе одржуваат настава во новоприлагодените простории, поради реновирање на училиштето во Косел, односно препокривање на кровната конструкција.
Учениците веќе се привикнуваат на новите општински “училници” во кои се уште не се инсталирани сите табли, ниту пак е во функција парното греење, а го нема и елктричното ѕвонче, кое е заменето со ѕвонец-клопотарец, и со кое привремено ќе се тропа за почеток и за крај на часот.
Тука, веќе се одржаа и родителските средби на кои родителите беа запознати со успехот на учениците по третото тромесечие, но и со привремената новонастаната состојба со училиштето. Учениците, а особено наставниците се потрудија да ги прилагодат своите работни обврски за да не трпи наставата во никој случај.
OhridNews
